Cuma l'è bell ai fest da Natal
Girà al paes cun piss tanti ciar,
truass a grüpp in mes a la gent
tücch bei alegar, visquar e cuntent;
sentì i campan sturnii a festa
e la piva sunaa dala banda in resta.
Vegna da pensà quand seum fiö
E mangieum patati, scicull e fasö.
S'aspiceva al Natal par scood la famm
E mangià al risott cunt al rost e al salam.
Par prima roba, levà sü prest
Guardà i belè dentar in dal cest.
Andà a mesa prima, duer imparàa
Parchè l'eva granda e biscantà.
Turnà a ca sübit parchè al fiucheva
E cunt i soquar sa sfurligheva.
Tücch in da la curta a fevan la spola
Da la ca al pulè par l'oca o la pola
Che dopu avei masà, spenà e netà been
Sa metevan a scaldà in sü fög dal camèn.
Quei da la Curtascia evan bravi a fa al rost,
in piasa Quaranta gh'eva al less cunt i cost
ala Zancona la pola cul bulogna
mentre in Pasquè capòn cul pürè.
Tütt l'eva bagnà, cun tanta pasiòn
Dal vin immancabil dal circulon,
e pö sa riunivan par sta tücch insèma
in ca dal Brusèn, dal cek o da la Leèna
e lì sa cuminceva a cantà al "Gloria"
tütt da filà e tütt a memoria
par rigurdà che ghè nasü al Bambèn
purtandu in tera a tucch un gran Ben.
( Poesia di Pedar Busoot)
Nessun commento:
Posta un commento