Bòna Pasqua di Carletto Oblò

BÒNA PASQUA

(di Carletto Oblò)

Bòna Pasqua, cara gent,

cont el coeur, in man gh’hoo nient,

voraria dav s'on piatt

on bèll oeuv de ciccolatt,

‘na colomba mandorlada

moresina e profumada;

ma son chì ‘me on presonee,

‘me on pollaster nel pollee.

Finirà poeu ‘sta bugada

de stà in cà… oueih che menada!

Hinn duu ann che sèmm saraa

presonee in di nòster cà.

“Tegnii dur e mollii nò!

Dai pazienza on poo ‘ncamò!”

Quèsta l’è la tiritera

che se sent mattina e sera.

Ma ‘sto virus malarbètt

brutt, schifos, ch’el nó desmètt

se pò nò trall in del fòss?

Ghe l’hoo chì… el me sta in sul gòss.

Sì el soo, son nò on poètta,

quèsta l'è la mia disdètta,

soo de vèss on versiroeu,

dai, pazienza mè car fioeu.

Dèss però, rivaa ‘l moment

che ve brasci-sù content

mi ve mandi tanti auguri

bèi, sincer, de coeur, v’el giuri!

Bòna Pasqua a tucc!!!