La Michetta: El sanguis - poesia

El sanguis
Al dì d'incoeu ghe n'emm de tutti i razz
Mc donald's, kebab, ristorant cines
Milan l'è tutt pien de cadenazz
se fa fadiga a mangià milanes
ona vòlta i stranier eren i toscan
dess te riconossi pù car Milan.
 
Te se ricordet quand serom fiolett?
La città d'ona vòlta, i temp indree
quand per pan gh'avevom domà michett
e i a comperaom domà dal prestinee
perchè gh'eren minga i supermercaa
menter incoeu ne semm tucc infesciaa.
 
Quand gh'aveom famm toeom 'na michetta
l'era quest el pan de quand serom fioeu
con denter salsiccion ò la filzetta
ròba che se ne troeuva pù incoeu
dess chì a Milan se semm imbarstardii
tròpp stranier, tròpp cines hann dervii.
 
Mì voeuri ritrovà la mia michetta
chì bei michett lievitaa, secch, ben còtt
on quaivun le ciama anca rosetta
dess el pan l'è surgelaa, semi còtt
la fraganza d'ona vòlta a gh'emm pù
anca Milan l'ha perduu i sò virtù.
 
I virtù ch'hinn ligaa a la tradizion
hann cambiaa tutt, hann cambiaa anca i nòmm
la città l'ha perduu l'ambizion
tra on poo perdaremm anca el Dòmm
“panino?” per numm l'esisteva nò
“sanguis” mì voeuri ciamall ancamò.
Cerchemm de ritroà l'identità
per Milan meravigliosa città.
Renato Colombo