Nostalgia

NOSTALGIA - Agosto - 
S’ciao amisa, indoe te seet?
Mì t’hoo vista chì rivà
quand el Tòni el t’ha sposaa.

Poeu t’hoo vista in gravidanza,
mì t’avevi già adottaa:
on poo divèrsa la nòstra età
i nòster strad s’hinn separaa.

Tutt l’è cominciaa e finii d’estaa.

A la sera la mia tosètta
la giugava sul balcon
e la toa pussee in alt
la giugava col ballon.
S’èmm guardaa, èmm sorriduu
anca se on poo lontan
i nòst coeur hann saltaa duu pian.

El balcon da quèll dì
l’è salòtt per tì e per mì,
te m’hee dii con tanta giòia
che tornava la cicògna

Lì sui scal s’èmm settaa giò
i tosanètt giughen on poo
guardom i fotografii
i nòst ciaccer on cinguettii.

Quanti vòlt se sèmm ciamaa
mì dal bass, tì da l’alt?
Passa i mes, torna l’estaa
ed on bèll bagain l’è naa

In cà mia, settada giò
èmm riduu, sognaa, piangiuu
se vedevom già nonnètt
cont i nòster duu omètt.
I nòster fioeu seren balòss
e saltaven su e giò
dal divan rococò.

T’hee stringiuu la mia tosètta
in giardin te l’hee portada
ne la toa cà te l’hee ospitada
come toa te l’hee trattada.
L’ha giugaa coi tò fiolin
come se fussen fradellin

Mì t’hoo amaa come mia tosa
hoo gioii per la toa giòia
hoo soffert p’el tò dolor.
Numm s’èmm semper rispettaa
per i problèma che gh’è in cà...

Te me scappet via,
te me ciamet quasi pù,
se l’è succèss mia dolce tosa?
T’hee desmetegaa la mama?
Pròppi vera che chi se ama
el spètta semper con amor...

Poeu quèll dì de la befana
maledètta mattinada!
A la pòrta t’hee sonaa,
el mè coeur l’ha sussultaa
la toa faccia l’era smòrta
...ma stà nò lì su la pòrta!
In cusina te see entrada
e te seret tanto malada.

Come pòdi chì spiegà
tutti i mes che hinn passaa?
Gh’è pù i sògn, domà dolor:
l’è distrutt el nòst amor!
La toa vos pù la me ciama
...e la bèlla cicciarada?

Tanti ann hinn giamò passaa
ma in fond in fond al coeur
mì me senti anmò ciamà:
guardi foeura guardi sù
al balcon te ghe see pù...
I mè oeugg guarden al ciel
l’emozion la stend on vel:
mì te tègni in del mè coeur e poeu torni denter cà.
Enrica

Gh'è ona quai "licenza poetica". Balcone = poggioeu, cinguettio = el cippà, fiolin al plural el fà fiolitt, sussultà = saltà via.