SANT ANTÒNI
(17 de genar)
di Carletto Oblò
Oh Antòni quanti nòmm
che t’hann daa ‘sti galantòmm
quèi che a tì, de tant in tant
vègnen per pregatt ‘me Sant:
chi te dis “Antòni abaa”,
chi “el Grand” t’ha nominaa,
chi te ciama ancamò
Sant Antòni del falò;
chi “d’Egitt”, chi “del desèrt”,
quanti nòmm, e tutt’incèrt;
“l’Eremita”, e per finì
“del porscèll” el disi mì.
In Egitt te see nassuu,
i tò gent poeu t’hee perduu
quand te seret gioinòtt,
t’hann lassaa on gròss bolgiòtt
i tò gent, inscì gh’hann dii,
tutt e tucc t’hee piantaa lì
per andà in del desèrt
tra serpent e tra lusèrt
in complètta povertà
in preghiera e castità.
Ona vita tormentada,
dal Demòni inzigada,
fin che on dì, in del desèrt
del Tebaide, quèst l’è cèrt,
a l’età de cent cinqu ann,
inscì par a oeugg e a spann,
t’hee pagaa el tò pedagg
per fà l’ultim tò viagg.
Chì a Milan, per tradizion,
con la musica e i canzon,
se festeggia ancamò
Sant Antoni del falò;
ècco che, gioin e anzian
che se tègnen per la man
corren, salten, fann di gioeugh
sempr’in torna a ‘sto gran foeugh
e ‘l ricòrd d’ona canzon
el me fa vegnì on magon:
“ Oh lilì, lilì, lilò,
ciappa i lègn per fà ‘l falò…”
Per finì ‘sta tiritera,
lì tra ‘l fumm de ‘sta foghera
ona supplica per mì:
“ Sant Antòni pensegh tì
famm tornà on quai ann indree,
tròpp forèst gh’èmm chì tra i pee!”
Nessun commento:
Posta un commento